पुणे : इंटरनॅशनल स्केटिंग युनियनतर्फे युरोपातील बेलारूस येथे घेण्यात आलेल्या आइस स्केटिंग स्पर्धेत पुण्याची स्वराली देव आणि ओम मुरकुटे या दोघांनी यशस्वी कामगिरी केली. पंधरा वर्षांखालील मुलांच्या गटात पाचशे, हजार आणि पंधराशे मीटर स्केटिंगचे टप्पे यशस्वीपणे पार करत ओमने बेलारूस करंडक पटकावला. १९ वर्षांखालील गटात स्वराली देवने करंडक जिंकला.
या स्पर्धेत भारतासह अमेरिका, रशिया आणि बेलारूस या देशांनी सहभाग घेतला होता. या स्पर्धेच्या आधी पंधरा दिवसांचे शिबिर आयोजित करण्यात आले होते. त्यातील कामगिरीच्या आधारे बेलारूस कपसाठी स्पर्धकांची निवड करण्यात आली. तेरा, पंधरा, एकोणीस वर्षांखालील आणि एकोणीस वर्षांच्या पुढील अशा चार गटात ही स्पर्धा झाली. पंधरा वर्षांखालील स्पर्धकांच्या गटाचे प्रतिनिधित्व ओम मुरकुटे याने केले. ओम बाणेरमधील डी. ए. व्ही पब्लिक स्कूलमध्ये नववीत शिकत आहे.
स्वराली देवने या स्पर्धेत एकोणीस वर्षे वयोगटाखालील स्पर्धकांच्या सहा मुलींच्या गटाचे प्रतिनिधित्व केले आणि बेलारूस करंडक जिंकला. आठव्या वर्षापासून स्वरालीने आइस स्केटिंगची आवड जोपासली आहे. तिने सलग तीन वर्षे राष्ट्रीय सुवर्णपदक मिळवले आहे. तसेच एशियन शॉर्ट ट्रॅक स्पीड आइस स्केटिंगमध्ये कास्यपदक मिळवले आहे. तिने फिलिपिन्स शॉर्ट ट्रेक आइस स्केटिंग ओपन चॅम्पियनशिप स्पर्धेत सुवर्णपदक, तर सिंगापूर ओपन आइस स्केटिंग चॅम्पियनशिप स्पर्धेत कास्यपदक मिळवले आहे. तसेच तिने तुर्की, थायलंड, फिलिपिन्स, इंडोनेशिया, सिंगापूर, बेलारूस, बल्गेरिया या सात देशांत आइस स्केटिंग स्पर्धेत भारताचे प्रतिनिधित्व केले आहे.
स्केटिंग स्पर्धेसाठी स्वराली देव आणि ओम मुरकुटे यांना भारताचे पहिले आइस स्केटिंग खेळाडू आणि राष्ट्रीय प्रशिक्षक अवधूत तावडे यांनी मार्गदर्शन केले. भारतात आइस रिंक उपलब्ध नसल्याने ओम प्रशिक्षक सुबोध पाटील यांच्या मार्गदर्शनाखाली रोलर स्केटिंग रिंकवरच आइस स्केटिंगचा सराव करत आहे. या पार्श्वभूमीवर त्याने मिळवलेले यश निश्चितच कौतुकास्पद आहे.
‘स्केटिंग हा माझा छंद आहे; पण या खेळासाठी वडिलांचा भक्कम पाठिंबा मिळत असल्याने अधिक प्रयत्न करण्याची शक्ती मिळते,’ अशी भावना ओमने व्यक्त केली. या खेळाला अधिक प्रोत्साहन देण्याची गरज असल्याचे मत स्वरालीने व्यक्त केले. स्वराली पाषाणला राहत असून, सिम्बायोसिस संस्थेत बारावीत शिकत आहे. घरच्यांचा पाठिंबा असल्यामुळेच उत्तुंग कामगिरी करणे शक्य झाल्याचे ती म्हणाली. मुंबईला एस्सेल वर्ल्डच्या रिंकवर आणि मग दिल्लीच्या रिंकवर तिने सराव केला होता.
(या दोन्ही खेळाडूंचे मनोगत पाहा सोबतच्या व्हिडिओत...)
